La galette des « rouais » d’la Manman de Calixe

 

    Je vâs vous racontë eun eistouere, pour de vrai, eyous qe faot pouint rigolë de ces chaozes-la ! Ça tet la galette des « rouais », ma manman qi tet eune fine qhéziniere, avet fabriqëe une galette d’Epifanie, eyous q’o metit eune feve q’avet la forme d’ene p’tite sainte-Anne bllanche e blleuve.

​

    Je l’avons manjèy le dimaine ao medi e ben sûr q’i nen restit renq’ eune petite part.

Batist, notr vieu tonton qi restet céz nous, pâssit par la, den la veprèy e fut atillonë par le bout de galette qi restet den le pllatè. I fit ni eune ni deûz, i l’envalit d’eune goulèy.

Yan meins, i ne ressentit pouint le passaïje de la p’tite sainte-Anne qi tet en-méle la pâte. Pôvr petite sainte-Anne qi avet les mains ouvertes e qi tenet son biao tabelier blleu!

​

    Forcenément Batiste, li, fut deranjë un p’tit meins i ne dit ren e le jou d’aprèy, i fit ses ézes den le bout de l’eqhurie és ch’vaos e ça nen restit là durant qheuqes temps.

Manman cherchet partout la p’tite sainte-Anne qi devet core servi l’anèy d’après …Q’ heule ne fut pâs sa surprinze cant o terouit la petite sainte-Anne den le mitan d’eune grosse carote q’avet poûssë den le courti e q’o navet arachèy pour fere de la soupe, carote pour sur engrèssèy  par le bon fumië de ch’vâ.

​

    E devinéz-don coment q’o reterouit la p’tite sainte-Anne. ?

E ben olavet les mains jouintes….

Je n’en sais ben ren si la p’tite sainte-Anne a resservi den les anèys qi sieuvirent.

Vrai de vrai pareil come je me nome Calixe et boune galette des « rouais » à tous !

Calixe …